శుభోదయ డైనమిక్ న్యూస్ –హుజూర్నగర్,సెప్టెంబర్ 8
“అప్పుడు ఉత్తమ్ వేరు.. ఇప్పుడు ఉత్తమ్ వేరు.. మంత్రి ఉత్తమ్ మారిపోయారా..?” ప్రస్తుతం హుజూర్నగర్ నియోజకవర్గ కాంగ్రెస్ రాజకీయ వర్గాల్లో ఈ ప్రశ్న చర్చనీయాంశంగా మారింది. అధికారం రాకముందు నాయకులు, కార్యకర్తలకు ఇచ్చిన హామీలు.. అధికారంలోకి వచ్చిన తర్వాత వాటి అమలులో జాప్యం జరుగుతోందనే విమర్శలు ఆశావహుల్లో అసంతృప్తికి కారణమవుతున్నాయి.
ఎన్నికల ముందు హామీలు.. ఇప్పుడు ఎదురుచూపులు
అసెంబ్లీ ఎన్నికల సమయంలో కాంగ్రెస్ పార్టీ విజయానికి అహర్నిశలు కృషి చేసిన నాయకులు, కార్యకర్తలకు రాజకీయంగా తగిన గుర్తింపు, ప్రాధాన్యత కల్పిస్తామని హామీలు ఇచ్చారని పలువురు గుర్తుచేస్తున్నారు. పార్టీ అధికారంలోకి వచ్చిన తర్వాత కూడా తమకు నామినేటెడ్ పదవులు, వివిధ సంస్థలు, కార్పొరేషన్లలో అవకాశాలు వస్తాయని ఆశించిన పలువురు నాయకులు ఇప్పటికీ ఎదురుచూస్తున్నారని రాజకీయ వర్గాల్లో చర్చ సాగుతోంది.
మున్సిపల్ ఎన్నికల హామీల సంగతేంటి?
మున్సిపల్ ఎన్నికల సమయంలో ఒకే వార్డులో కాంగ్రెస్ పార్టీ నుంచి ఇద్దరు అభ్యర్థులు పోటీకి సిద్ధమైన సందర్భంలో పార్టీ ప్రయోజనాలను దృష్టిలో ఉంచుకుని ఒక అభ్యర్థిని పోటీ నుంచి తప్పించేందుకు హామీ ఇచ్చారనే చర్చ అప్పట్లో జరిగింది. ఇచ్చిన హామీ మేరకు ఒకరు పోటీ నుంచి తప్పుకోవడానికి సహకరించారని, అనంతరం పార్టీ మున్సిపాలిటీలో మెజారిటీ సాధించిన తర్వాత ఆ హామీ అమలుపై స్పష్టత లేకుండా పోయిందనే ఆరోపణలు వినిపిస్తున్నాయి.
అధికారం లేనప్పుడు ఒకలా.. అధికారంలోకి వచ్చాక మరోలా?
ప్రతిపక్షంలో ఉన్న సమయంలో కార్యకర్తలకు దగ్గరగా ఉండటం, వారి సమస్యలను తెలుసుకోవడం, పార్టీ కోసం కష్టపడిన వారికి భవిష్యత్లో రాజకీయ అవకాశాలు కల్పిస్తామని భరోసా ఇవ్వడం రాజకీయాల్లో సాధారణమే. అయితే అధికారంలోకి వచ్చిన తర్వాత కూడా అదే కార్యకర్తలకు అందుబాటులో ఉండటం, ఇచ్చిన మాటలను గుర్తుంచుకోవడం నాయకత్వ బాధ్యత అని పార్టీ వర్గాల్లో అభిప్రాయాలు వ్యక్తమవుతున్నాయి.
యువతకు రాజకీయ అవకాశాలు కల్పించాలి
హుజూర్నగర్ నియోజకవర్గంలో రాజకీయ పదవుల కోసం ఎదురుచూస్తున్న వారిలో యువత కూడా పెద్ద సంఖ్యలో ఉన్నారు. ఎన్నికల సమయంలో క్షేత్రస్థాయిలో పార్టీ కోసం పనిచేసిన యువ నాయకులు, కార్యకర్తలకు నామినేటెడ్ పదవులు, వివిధ సంస్థలు, కార్పొరేషన్లలో అవకాశం కల్పించాలని వారు కోరుతున్నారు.పార్టీ కోసం కష్టపడిన యువతకు అవకాశం కల్పిస్తే భవిష్యత్లో పార్టీకి బలమైన నాయకత్వం తయారవుతుంది. పదవులు కొద్దిమంది నాయకులకే పరిమితం కాకుండా కష్టపడిన వారికి గుర్తింపు ఇవ్వాలి” అనే అభిప్రాయాలు యువ నాయకుల నుంచి వ్యక్తమవుతున్నాయి.
హుజూర్నగర్కు రాష్ట్ర స్థాయి పదవులు ఎప్పుడు?
రాష్ట్ర స్థాయి కార్పొరేషన్లు, వివిధ నామినేటెడ్ పదవుల భర్తీ ప్రక్రియ కొనసాగుతున్న నేపథ్యంలో హుజూర్నగర్ నియోజకవర్గానికి చెందిన కాంగ్రెస్ నాయకులు, కార్యకర్తలకు ఎంత మేరకు ప్రాధాన్యత దక్కుతుందన్నది ఆసక్తికరంగా మారింది.హుజూర్నగర్కు ఎన్ని పదవులు వస్తాయి..? ఎవరికి అవకాశం దక్కుతుంది..? పార్టీ కోసం కష్టపడిన యువతకు ఎంత ప్రాధాన్యత లభిస్తుంది..?” అనే ప్రశ్నలు ఆశావహుల్లో వినిపిస్తున్నాయి.
ఇచ్చిన హామీలపై స్పష్టత ఇవ్వాలి
గతంలో రాజకీయ పదవుల విషయంలో ఇచ్చిన హామీలపై మంత్రి ఉత్తమ్కుమార్రెడ్డి స్పష్టత ఇవ్వాలని పలువురు నాయకులు, కార్యకర్తలు కోరుతున్నారు. ఎవరికి ఎలాంటి హామీ ఇచ్చారు..? ఏ పరిస్థితుల్లో ఇచ్చారు..? ఇప్పటివరకు ఎన్ని హామీలు అమలు చేశారు..? ఇంకా పెండింగ్లో ఉన్న హామీలను ఎప్పటిలోగా నెరవేరుస్తారు..? అనే అంశాలపై స్పష్టత ఇవ్వాలని ఆశావహులు కోరుతున్నారు.
మాట నిలబెట్టుకుంటారా.. యువతకు న్యాయం చేస్తారా?
రాజకీయాల్లో నాయకుడి మాటకు ఎంతో విలువ ఉంటుందని, పార్టీ కోసం కష్టపడిన కార్యకర్తలకు ఇచ్చిన హామీలను నిలబెట్టుకోవడం ద్వారా నాయకత్వంపై విశ్వాసం మరింత పెరుగుతుందని రాజకీయ వర్గాలు అభిప్రాయపడుతున్నాయి.ఇప్పటికైనా హుజూర్నగర్ నియోజకవర్గంలోని పార్టీ నాయకులు, కార్యకర్తల అభిప్రాయాలను పరిగణనలోకి తీసుకుని, పార్టీ కోసం నిజంగా కష్టపడిన వారికి, ముఖ్యంగా యువతకు రాజకీయ పదవుల్లో సముచిత ప్రాధాన్యత కల్పించాలని యువ నాయకులు కోరుతున్నారు.ఎన్నికల సమయంలో వెంట నడిచిన వారికి గుర్తింపు.. కష్టపడిన వారికి పదవి.. యువతకు అవకాశం.. ఇదే ప్రస్తుతం హుజూర్నగర్ కాంగ్రెస్ శ్రేణుల్లో వినిపిస్తున్న ప్రధాన ఆకాంక్షగా మారింది. మరి మంత్రి ఉత్తమ్కుమార్రెడ్డి ఈ ఆశావహుల ఆకాంక్షలకు ఏ మేరకు న్యాయం చేస్తారో వేచి చూడాల్సిందే.