కరువు కోరల్లో నేరేడుచర్ల.. బియ్యం ధరలు భగ్గు! సామాన్యుడికి అందని బియ్యం.. కిలో రూ.80 నుంచి రూ.90 వరకు విక్రయాలు రూ.49కే బియ్యం అందిస్తామన్న హామీ ఏమైంది? అధికారుల హెచ్చరికలు ప్రకటనలకే పరిమితమా?

నేరేడుచర్ల, నవంబర్ 7, శుభోదయ డైనమిక్ వార్త

కరువు పరిస్థితులు నేరేడుచర్ల మండల ప్రజల జీవితాలను అతలాకుతలం చేస్తున్నాయి. సరైన వర్షాలు లేక సాగునీటి సమస్యలు తీవ్రం కావడంతో వ్యవసాయ రంగంపై ప్రతికూల ప్రభావం పడుతోంది. సాగర్ ఆయకట్టు పరిధిలో నీటి కొరత, బోర్లలో నీరు తగ్గిపోవడంతో రైతులు తీవ్ర ఇబ్బందులు ఎదుర్కొంటున్నారు. వ్యవసాయ పనులు తగ్గడంతో కూలీలకు ఉపాధి కరువవుతుండగా, మరోవైపు నిత్యావసర వస్తువుల ధరలు పెరగడం సామాన్య కుటుంబాలకు భారంగా మారుతోంది.

బియ్యం ధరల మంట.. సామాన్యుడి బతుకు బేజారు!

మార్కెట్‌లో బియ్యం ధరలు సామాన్యులకు అందనంత ఎత్తుకు చేరుతున్నాయని వినియోగదారులు ఆవేదన వ్యక్తం చేస్తున్నారు. ప్రస్తుతం కొన్ని రకాల బియ్యం కిలో రూ.80 నుంచి రూ.90 వరకు విక్రయిస్తున్నారని చెబుతున్నారు. దీంతో పేద, మధ్యతరగతి కుటుంబాలు నెలవారీ బడ్జెట్‌ను ఎలా సర్దుబాటు చేసుకోవాలో తెలియక ఆందోళన చెందుతున్నాయి. ఒకవైపు ఉపాధి లేక ఆదాయం తగ్గుతుంటే, మరోవైపు బియ్యం ధరలు పెరగడం కుటుంబ పోషణను భారంగా మారుస్తోంది.

అధికారుల హెచ్చరికలు ఎక్కడ.. తనిఖీలు ఏవీ?

అధిక ధరలకు బియ్యం విక్రయిస్తే చర్యలు తీసుకుంటామని అధికారులు హెచ్చరిస్తున్నప్పటికీ నేరేడుచర్ల మండలంలో క్షేత్రస్థాయిలో తనిఖీలు చేపడుతున్నారా? అన్న ప్రశ్నలు వినిపిస్తున్నాయి. బియ్యం దుకాణాలు, రైస్ మిల్లులు, గోదాముల్లో నిల్వలు, విక్రయ ధరలను అధికారులు పరిశీలించాలని ప్రజలు కోరుతున్నారు.

రూ.49కే బియ్యం.. ఆచరణలోకి ఎప్పుడూ?

కిలో బియ్యం రూ.49కే అందిస్తామని చేసిన ప్రకటనలతో పేదలకు ఊరట లభిస్తుందని భావించినప్పటికీ, ఆ హామీ అమలుపై స్పష్టత లేదని వినియోగదారులు అంటున్నారు. నేరేడుచర్ల మండలంలో ప్రత్యేక విక్రయ కేంద్రాలు ఏర్పాటు చేసి తక్కువ ధరకు బియ్యం అందించాలని కోరుతున్నారు.

ఇప్పటికైనా అధికారులు స్పందించాలి!

పౌరసరఫరాల శాఖ, విజిలెన్స్ అధికారులు మండలంలోని బియ్యం దుకాణాలు, రైస్ మిల్లులు, గోదాముల్లో ఆకస్మిక తనిఖీలు నిర్వహించాలని ప్రజలు డిమాండ్ చేస్తున్నారు. అక్రమ నిల్వలు, అధిక ధరల విక్రయాలపై చర్యలు తీసుకోవడంతో పాటు ప్రభుత్వం ప్రకటించిన తక్కువ ధరల బియ్యం అందుబాటులోకి తీసుకురావాలని కోరుతున్నారు.