టీచర్స్ కాలనీలో పెట్రోల్ దొంగల కలకలం! తెల్లవారుజామున బైక్‌ల నుంచి పెట్రోల్ చోరీ? గస్తీ ముమ్మరం చేయాలని కాలనీవాసుల విజ్ఞప్తి

శుభోదయ డైనమిక్ న్యూస్, హుజూర్‌నగర్, అక్టోబర్ 24

సూర్యాపేట జిల్లా హుజూర్‌నగర్ పట్టణంలోని టీచర్స్ కాలనీలో ద్విచక్ర వాహనాల నుంచి పెట్రోల్ చోరీ జరుగుతోందన్న ఆరోపణలు స్థానికంగా కలకలం రేపుతున్నాయి. గుర్తుతెలియని వ్యక్తులు తెల్లవారుజామున బైక్‌ల నుంచి పెట్రోల్ తీసుకెళ్తున్నట్లు కాలనీవాసులు ఆందోళన వ్యక్తం చేస్తున్నారు.

తెల్లవారుజామునే చోరీలు?

స్థానికులు తెలిపిన వివరాల ప్రకారం.. పల్సర్, యూనికార్న్ వంటి ద్విచక్ర వాహనాలపై వస్తున్న కొందరు వ్యక్తులు తెల్లవారుజామున 3 గంటల నుంచి 5 గంటల మధ్య కాలనీలో సంచరిస్తూ పెట్రోల్ చోరీలకు పాల్పడుతున్నట్లు ఆరోపిస్తున్నారు. దీంతో వాహనదారులు అప్రమత్తంగా ఉండాల్సిన పరిస్థితి ఏర్పడిందని పేర్కొంటున్నారు.

పోలీసులు నిఘా పెంచాలి

టీచర్స్ కాలనీలో జరుగుతున్నట్లు చెబుతున్న పెట్రోల్ చోరీలపై పోలీసులు దృష్టి సారించి, ఘటనలపై విచారణ జరపాలని కాలనీవాసులు కోరుతున్నారు. తెల్లవారుజామున గస్తీని ముమ్మరం చేసి, అనుమానాస్పద వ్యక్తుల కదలికలపై నిఘా ఉంచాలని విజ్ఞప్తి చేస్తున్నారు. ఇలాంటి ఘటనలు పునరావృతం కాకుండా చర్యలు తీసుకుని కాలనీలో భద్రతను పటిష్ఠం చేయాలని కోరుతున్నారు.