డైనమిక్ న్యూస్, వినుకొండ, ఫిబ్రవరి 17
వైసీపీ, మాజీ ఎమ్మెల్యే బొల్లా తోడుంటారని భరోసా
పల్నాడు జిల్లా వినుకొండ పట్టణంలో నడిరోడ్డుపై దారుణ హత్యకు గురైన రషీద్ కుటుంబాన్ని ఆంధ్రప్రదేశ్ మాజీ ముఖ్యమంత్రి, వైఎస్సార్ కాంగ్రెస్ పార్టీ అధినేత వైఎస్ జగన్మోహన్ రెడ్డి ఫోన్ ద్వారా పరామర్శించారు. ఈ ఘటనపై ఆయన తీవ్ర దిగ్భ్రాంతి వ్యక్తం చేశారు.
వరుస విషాదాలు
వినుకొండలో జరిగిన దారుణ ఘటనలో రషీద్ హత్యకు గురవగా, ఆ సంఘటనను తట్టుకోలేక అతని తండ్రి షేక్ ఫరీసా ఆరోగ్యం క్షీణించి ఇటీవల మృతి చెందారు. కొడుకు కళ్లముందే హత్యకు గురికావడం, ఆ బాధతో తండ్రి మరణించడం కుటుంబాన్ని తీవ్ర విషాదంలోకి నెట్టింది.
ధైర్యం చెప్పిన జగన్
తాజాగా రషీద్ తల్లికి స్వయంగా ఫోన్ చేసిన జగన్, ఆమెతో మాట్లాడి ఓదార్చారు. కొడుకు, భర్తను కోల్పోయి పుట్టెడు దుఃఖంలో ఉన్న ఆమెకు ధైర్యం చెప్పి, ఏ పరిస్థితుల్లోనైనా పార్టీ అండగా ఉంటుందని హామీ ఇచ్చారు.
పార్టీ అండగా ఉంటుందని హామీ
ఈ కష్టకాలంలో మాజీ ఎమ్మెల్యే బొల్లా బ్రహ్మనాయుడు సహా వైఎస్సార్ కాంగ్రెస్ పార్టీ శ్రేణులు అన్ని విధాలుగా కుటుంబానికి తోడుగా నిలుస్తాయని ఆయన స్పష్టం చేశారు.మాజీ ముఖ్యమంత్రి స్వయంగా ఫోన్ చేసి పరామర్శించడంపై కుటుంబ సభ్యులు కృతజ్ఞతలు తెలిపారు. వినుకొండలో చోటుచేసుకున్న ఈ ఘటనలు స్థానికంగా తీవ్ర చర్చనీయాంశంగా మారాయి.