విమాన–హెలికాప్టర్ ప్రమాదాల్లో ప్రముఖుల మృతి… దేశాన్ని కుదిపేసిన విషాద ఘటనలు రాజకీయాలు, సినీ రంగం, శాస్త్ర రంగాల్లో తీరని లోటు అనూహ్య ప్రమాదాల్లో ప్రాణాలు కోల్పోయిన ప్రముఖుల జాబితా

డైనమిక్ న్యూస్ డెస్క్, తెలంగాణా, ఏపి , జనవరి 29

విమానాలు, హెలికాప్టర్లు ఆధునిక రవాణా సాధనాలైనా, అప్పుడప్పుడు సంభవించే ప్రమాదాలు దేశానికే కాక ప్రపంచానికీ తీవ్ర విషాదాన్ని మిగులుస్తున్నాయి. ఈ ప్రమాదాల్లో అనేక మంది ప్రముఖులు ప్రాణాలు కోల్పోవడం చరిత్రలో తీరని విషాద అధ్యాయాలుగా నిలిచాయి. రాజకీయ, సినీ, శాస్త్రీయ రంగాలకు చెందిన ప్రముఖుల మృతి ఆయా రంగాల్లో తీరని లోటుగా మారింది.

రాజకీయ రంగంలో విషాదాలు

భారత రాజకీయ చరిత్రలో విమాన, హెలికాప్టర్ ప్రమాదాల్లో పలువురు అగ్రనేతలు మృతి చెందారు.తెలంగాణ, ఆంధ్రప్రదేశ్ రాష్ట్రాల ప్రజల గుండెల్లో చిరస్థాయిగా నిలిచిన మాజీ ముఖ్యమంత్రి వైఎస్ రాజశేఖర్ రెడ్డి హెలికాప్టర్ ప్రమాదంలో మరణించగా, దేశ తొలి చీఫ్ ఆఫ్ డిఫెన్స్ స్టాఫ్ బిపిన్ రావత్ ఆయన సతీమణి సహా హెలికాప్టర్ ప్రమాదంలో ప్రాణాలు కోల్పోయారు.ఇక మాజీ ప్రధాని ఇందిరాగాంధీ కుమారుడు సంజయ్ గాంధీ, లోక్‌సభ మాజీ స్పీకర్ జీఎంసీ బాలయోగి, కాంగ్రెస్ సీనియర్ నేత మాధవరావు సింధియా, అరుణాచల్ ప్రదేశ్ మాజీ సీఎం దొర్జీ ఖండూ, ఇరాన్ అధ్యక్షుడు ఇబ్రహీం రైసీ వంటి నేతలు కూడా ఈ తరహా ప్రమాదాల్లో మృతి చెందారు.

సినీ రంగాన్ని కలిచివేసిన ఘటనలు

సినీ ప్రపంచంలోనూ విమాన ప్రమాదాలు తీవ్ర విషాదాన్ని మిగిల్చాయి. ప్రముఖ నటి సౌందర్య, యువ నటి తరుణి సన్దేవ్, మలయాళ సినీ నటుడు జయన్ వంటి వారు ప్రమాదాల్లో మరణించి అభిమానులను శోకసంద్రంలో ముంచారు. వారి ఆకస్మిక మరణాలు సినీ రంగానికి తీరని నష్టంగా మారాయి.

శాస్త్ర రంగంలో తీరని లోటు

భారత అణు శాస్త్ర పితామహుడిగా గుర్తింపు పొందిన డాక్టర్ హోమీ జె. బాబా విమాన ప్రమాదంలో మృతి చెందడం దేశ శాస్త్రీయ రంగానికి తీవ్ర దెబ్బగా నిలిచింది. ఆయన సేవలు, పరిశోధనలు భారత శాస్త్రాభివృద్ధికి మైలురాయిగా నిలిచాయి.

దేశాన్ని కుదిపేసిన విషాదాలు

ఈ ప్రమాదాలు కేవలం వ్యక్తుల నష్టమే కాకుండా దేశ అభివృద్ధి ప్రయాణంలో తీరని లోటుగా మారాయి. ప్రముఖుల ఆకస్మిక మరణాలు ప్రజలను దిగ్భ్రాంతికి గురి చేయడంతో పాటు భద్రతా ప్రమాణాలపై చర్చలకు దారి తీశాయి. భవిష్యత్తులో ఇటువంటి ప్రమాదాలు పునరావృతం కాకుండా కఠిన చర్యలు అవసరమని నిపుణులు సూచిస్తున్నారు.