డైనమిక్,నేరేడుచర్ల, అక్టోబర్ 18
రాష్ట్ర వ్యాప్తంగా బీసీ సంఘాలు పిలుపునిచ్చిన బంద్కు మద్దతుగా నేరేడుచర్ల పట్టణంలో భారతీయ జనతా పార్టీ ఆధ్వర్యంలో శనివారం బంద్ నిర్వహించారు. ఈ సందర్భంగా ప్రధాన కూడలిలో బీజేపీ రాష్ట్ర నాయకులు బాల వెంకటేశ్వర్లు, పార్థనబోయిన విజయ్ కుమార్ మాట్లాడుతూ — బీసీలకు 42 శాతం రిజర్వేషన్ బిల్లు కేంద్రం వద్ద పెండింగ్లో ఉండటానికి కేంద్ర ప్రభుత్వం కారణం కాదని, రాష్ట్ర ప్రభుత్వంలోని చట్టపరమైన లోపాలు, రాజకీయ వైఖరే ప్రధాన కారణమని అన్నారు.వారు మాట్లాడుతూ, “బీసీల హక్కులను కాంగ్రెస్ ప్రభుత్వం రాజకీయంగా ఉపయోగించు కుంటోంది. కోర్టులలో బిల్లును సరిగ్గా రక్షించక పోవడం వల్లే బీసీలకు అన్యాయం జరుగుతోంది. 42 శాతం రిజర్వేషన్లలో మతపరమైన కోత విధించడం ద్వారా అసలు బీసీలకు దక్కాల్సిన వాటా తగ్గించడమే కాంగ్రెస్ ఉద్దేశం” అని ఆరోపించారు.
బాల వెంకటేశ్వర్లు మాట్లాడుతూ — “
కాంగ్రెస్ పార్టీ మైనారిటీ ఓటు బ్యాంక్ కోసం బీసీల హక్కులను తాకట్టు పెడుతోంది. బీసీ రిజర్వేషన్లు కేవలం వెనుకబడిన తరగతులకు మాత్రమే కేటాయించాలి. మతం ఆధారంగా రిజర్వేషన్లు ఇవ్వడాన్ని బీజేపీ గట్టిగా వ్యతిరేకిస్తుంది” అన్నారు. అలాగే ఆయన పేర్కొన్నారు: “కాంగ్రెస్ ప్రభుత్వం ఢిల్లీలో ధర్నాలు చేయడం, కేంద్రంపై ఆరోపణలు వేయడం రాజకీయ నాటకమే. బీసీలను మోసం చేస్తూ వారి ఆశలతో ఆడుకుంటున్నారు. స్థానిక సంస్థల ఎన్నికలు నిర్వహించడంలో వైఫల్యం, పాలనలో లోపాలను కప్పిపుచ్చేందుకే ఈ బీసీ రిజర్వేషన్ అంశాన్ని ప్రధానాంశంగా మార్చారు” అని విమర్శించారు.“బీజేపీ ఎప్పుడూ బీసీల సాధికారతకు కట్టుబడి ఉంటుంది. దేశానికి బీసీ నాయకుడైన నరేంద్ర మోదీని ప్రధానిగా చేసిన ఏకైక పార్టీ బీజేపీ. కేంద్ర కేబినెట్లో 27 మందికి పైగా బీసీ మంత్రులు ఉన్నారు. పలు రాష్ట్రాల్లో బీసీలను ముఖ్యమంత్రులుగా నియమించింది కూడా బీజేపీనే” అని తెలిపారు.”బీసీలకు 42 శాతం రిజర్వేషన్ పూర్తిస్థాయిలో, మతపరమైన కోత లేకుండా ఇవ్వాలని మేము డిమాండ్ చేస్తున్నాము” అని నాయకులు స్పష్టం చేశారు.ఈ కార్యక్రమంలో బీసీ నాయకులు ఉరిమిళ్ళ రామ్మూర్తి, తాళ్లూరి రమేష్ నాయుడు, ఆకుల జగతయ్య గౌడ్, కాలం నాగయ్య, అంబటి నాగేశ్వరరావు, గంధం శావయ్య, బొలిశెట్టి శంకర్, టౌన్ మండల అధ్యక్షులు కొనతం నాగిరెడ్డి, చింతకుంట్ల రాజేష్ రెడ్డి, పాలకవీడు మండల అధ్యక్షులు రమావత్ నరి నాయక్, సీనియర్ నాయకులు సంకలమద్ది సత్యనారాయణ రెడ్డి, మెట్టు శ్రీనివాస్ రెడ్డి, జూలూరి అశోక్, తాళ్ల నరేందర్ రెడ్డి, నందిపాటి హిందూజా, కొప్పుల రాంరెడ్డి, ఏమిరెడ్డి శంకర్ రెడ్డి, దిద్దకుంట్ల విజయ్ రెడ్డి, దేవిరెడ్డి నాగిరెడ్డి తదితరులు పాల్గొన్నారు.