నల్లగొండ బ్యూరో, డైనమిక్ న్యూస్, డిసెంబర్ 14
నల్గొండ జిల్లా వ్యాప్తంగా జరుగుతున్న రెండవ విడత గ్రామపంచాయతీ ఎన్నికల పోలింగ్ సందర్భంగా జిల్లా కలెక్టర్ ఇలా త్రిపాఠి, గ్రామపంచాయతీ ఎన్నికల జిల్లా సాధారణ పరిశీలకురాలు, ఐఏఎస్ అధికారి కొర్ర లక్ష్మితో కలిసి ఆదివారం మిర్యాలగూడ డివిజన్లోని దామరచర్ల మండల కేంద్రంలో ఉన్న జిల్లా పరిషత్ ఉన్నత పాఠశాల పోలింగ్ కేంద్రాలను ఆకస్మికంగా తనిఖీ చేశారు.
ఓటర్లతో ముఖాముఖి – గుర్తింపు కార్డుల పరిశీలన
ఈ సందర్భంగా పోలింగ్ కేంద్రానికి వచ్చిన ఓటర్లతో కలెక్టర్ ముఖాముఖి మాట్లాడి, ఓటు హక్కు వినియోగం కోసం తీసుకువచ్చిన గుర్తింపు కార్డులపై వివరాలు అడిగి తెలుసుకున్నారు. పోలింగ్ ప్రక్రియపై ఓటర్ల నుంచి అభిప్రాయాలు సేకరించారు.
పోలింగ్ బూత్లో అధిక సంఖ్యలో ఓటర్లు – ప్రిసైడింగ్ అధికారిపై చర్యలు
పాఠశాల ఆవరణలోని ఒక పోలింగ్ బూత్ను పరిశీలించిన జిల్లా కలెక్టర్, పరిమితికి మించి ఓటర్లు బూత్లో ఉండడంపై తీవ్ర అసంతృప్తి వ్యక్తం చేశారు. పోలింగ్ కేంద్ర నిర్వహణలో నిర్లక్ష్యం వహించారని భావించిన ప్రిసైడింగ్ అధికారి, స్కూల్ అసిస్టెంట్ సంధ్యకు షోకాజ్ నోటీసు జారీ చేయాలని అధికారులను ఆదేశించారు.ప్రతిరోజూ టెలీకాన్ఫరెన్సులు, శిక్షణ కార్యక్రమాల ద్వారా స్పష్టమైన ఆదేశాలు ఇచ్చినా నిర్లక్ష్యంగా వ్యవహరించడం తగదని కలెక్టర్ హెచ్చరించారు. ఎన్నికల నిర్వహణలో నిర్లక్ష్యం వహిస్తే కఠిన చర్యలు తప్పవని స్పష్టం చేశారు.
కౌంటింగ్ ప్రక్రియపై స్పష్టమైన ఆదేశాలు
పోలింగ్ అనంతరం కౌంటింగ్ను అత్యంత జాగ్రత్తగా నిర్వహించాలని కలెక్టర్ ఆదేశించారు. అత్యవసర పరిస్థితుల్లో ఆర్ఓలు బయటకు వెళ్లాల్సి వస్తే, తప్పనిసరిగా స్టాట్యూటరీ మెటీరియల్ను ఒక గెజిటెడ్ అధికారికి అప్పగించి వెళ్లాలని సూచించారు.
అన్ని పోలింగ్ కేంద్రాల నుంచి వచ్చిన బ్యాలెట్లు, ఎన్నికల సామగ్రిని సమీపంలోని ఎస్టీఓలో భద్రపరిచే బాధ్యత ఎంపీడీవోపై ఉంటుందని తెలిపారు.
ఉదయం 11 గంటల వరకు 32 శాతం పోలింగ్
తనిఖీల అనంతరం మీడియా ప్రతినిధులతో మాట్లాడిన జిల్లా కలెక్టర్, దామరచర్ల జిల్లా పరిషత్ ఉన్నత పాఠశాలలో 10 వార్డులకు పోలింగ్ జరుగుతున్నట్లు, పోలింగ్ ప్రశాంతంగా కొనసాగుతున్నట్లు తెలిపారు. ఉదయం 11 గంటల వరకు 32 శాతం పోలింగ్ నమోదైనట్లు వెల్లడించారు.దామరచర్ల మండలం పెద్ద మండలం కావడంతో కౌంటింగ్లో ఎలాంటి ఇబ్బందులు తలెత్తకుండా ముందస్తు చర్యలు తీసుకున్నట్లు తెలిపారు. పోలింగ్ ముగిసిన అనంతరం మధ్యాహ్నం 2 గంటలకు కౌంటింగ్ ప్రారంభమవుతుందని, ఎన్నికల కమిషన్ నిబంధనల ప్రకారం కౌంటింగ్ చేపట్టి ఫలితాల ప్రకటనలో ఎలాంటి జాప్యం చేయవద్దని స్టేజ్–టు–రిటర్నింగ్ అధికారిని ఆదేశించారు.
మిర్యాలగూడ డివిజన్లో ప్రశాంతంగా పోలింగ్
ఇంతకుముందు మిర్యాలగూడ సబ్ కలెక్టర్ నారాయణ్ అమిత్, రెండవ విడత గ్రామపంచాయతీ ఎన్నికలు జరుగుతున్న మిర్యాలగూడ డివిజన్ పరిధిలోని అన్ని మండలాల్లో పోలింగ్ ప్రశాంతంగా కొనసాగుతున్నట్లు ఎన్నికల పరిశీలకురాలు, జిల్లా కలెక్టర్కు వివరించారు.
తనిఖీల్లో పాల్గొన్న అధికారులు
ఈ కార్యక్రమంలో మిర్యాలగూడ సబ్ కలెక్టర్, స్థానిక సంస్థల ఇన్చార్జ్ అదనపు కలెక్టర్ నారాయణ్ అమిత్, డీపీఓ వెంకయ్య, దామరచర్ల ప్రత్యేక అధికారి, డీసీఓ పత్యా నాయక్, జిల్లా పశు సంవర్థక శాఖ అధికారి డాక్టర్ రమేష్ తదితర అధికారులు పాల్గొన్నారు.