దయనీయ స్థితిలో ప్రభుత్వ ఆసుపత్రులు – ఎంజీఎంలో నిర్లక్ష్యం బహిర్గతం

డైనమిక్,వరంగల్, అక్టోబర్ 25

వరంగల్ జిల్లా కేంద్రంలోని మహాత్మా గాంధీ మెమోరియల్ (ఎంజీఎం) ఆసుపత్రిలో ప్రభుత్వ వైద్య సేవల దయనీయ పరిస్థితులు మరోసారి బయటపడ్డాయి. ఆసుపత్రి సిబ్బంది నిర్లక్ష్యానికి రెండు పసిపిల్లలు బలైపోయే పరిస్థితి ఏర్పడింది.

ఒకే సిలిండర్‌పై ఇద్దరు చిన్నారులు

శుక్రవారం ఉదయం ఆసుపత్రిలో ఇద్దరు పసిపిల్లలకు శ్వాసలో ఇబ్బందులు తలెత్తడంతో వైద్యులు ఆక్సిజన్ అవసరం ఉందని సూచించారు. కానీ ఆసుపత్రిలో ఆక్సిజన్ సిలిండర్లు సరిపోకపోవడంతో, సిబ్బంది ఒకే సిలిండర్‌ను ఇద్దరికీ కలిపి అమర్చారు. ఈ ఘటనను చూసిన ఇతర రోగుల కుటుంబ సభ్యులు తీవ్ర ఆగ్రహం వ్యక్తం చేశారు.

తల్లిదండ్రులే తరలించిన పిల్లలు

పిల్లల పరిస్థితి విషమంగా ఉండడంతో వారిని పరీక్షలకు తరలించాల్సి వచ్చింది. కానీ కేర్ టేకర్లు లేకపోవడంతో, ఆక్సిజన్ సిలిండర్‌తో పాటు చిన్నారులను తల్లిదండ్రులే స్వయంగా మోసుకెళ్లడం హృదయ విదారక దృశ్యమైంది.

వైద్య విభాగంపై విమర్శలు

రోగుల ప్రాణాలతో ఈ స్థాయిలో ఆటలాడటాన్ని ప్రజలు తీవ్రంగా ఖండిస్తున్నారు. “ఇది ప్రభుత్వ ఆసుపత్రా సదుపాయాల అసలు పరిస్థితి” అంటూ స్థానికులు ఆగ్రహం వ్యక్తం చేస్తున్నారు. ఆసుపత్రి పరిపాలన నిర్లక్ష్యాన్ని అధికారులు గమనించి కఠిన చర్యలు తీసుకోవాలని ప్రజలు డిమాండ్ చేస్తున్నారు.

సిబ్బందిపై చర్యలు తీసుకోవాలి

ప్రభుత్వం ప్రతిసారి ప్రజా వైద్య సేవలను మెరుగుపరుస్తామని చెబుతున్నా, ఎంజీఎం ఘటన ఆ వాదనలకు విరుద్ధంగా ఉందని ఆరోగ్య రంగం కార్యకర్తలు వ్యాఖ్యానిస్తున్నారు. ఆసుపత్రిలోని లోపాలు, సిబ్బంది బాధ్యతారాహిత్యంపై జిల్లా వైద్యాధికారి తక్షణ విచారణ జరిపి చర్యలు తీసుకోవాలని వారు కోరుతున్నారు.