డైనమిక్ ,హైదరాబాద్, అక్టోబర్ 28
తెలుగు సినీ కార్మిక సంఘాల ఆధ్వర్యంలో హైదరాబాద్లో నిర్వహించిన అభినందన సభలో ముఖ్యమంత్రి ఏ. రేవంత్ రెడ్డి ఘనంగా పాల్గొన్నారు. సినీ పరిశ్రమ అభివృద్ధికి, కార్మికుల సంక్షేమానికి ప్రభుత్వం కట్టుబడి ఉందని ముఖ్యమంత్రి స్పష్టం చేశారు.
“హైదరాబాద్కి సినీ పరిశ్రమ రాకకు మర్రి చెన్నారెడ్డి కారణం”
తెలుగు చిత్ర పరిశ్రమ హైదరాబాద్కు తరలివచ్చేలా చారిత్రక నిర్ణయం తీసుకున్నది ఆనాటి ముఖ్యమంత్రి మర్రి చెన్నారెడ్డి అని రేవంత్ రెడ్డి గుర్తుచేశారు.ఆయన అన్న ఎన్టీఆర్, నాగేశ్వరరావు, కృష్ణ వంటి మహానటులను స్వయంగా కలసి ప్రోత్సహించారు. వారి సహకారంతోనే తెలుగు సినిమాకు హైదరాబాద్ చిరస్థాయిగా నిలిచింది,” అని పేర్కొన్నారు.
“ప్రభాకర్ రెడ్డి కృషి మరువలేం”
సినీ కార్మికుల కోసం డా. ప్రభాకర్ రెడ్డి మణికొండలో తన 10 ఎకరాల స్థలాన్ని దానం చేసి చిత్రపురి కాలనీ ఏర్పాటుకు పునాదులు వేసారని ఆయన గుర్తుచేశారు.
“ఆ కాలనీ సినీ కార్మికుల శ్రమ, అంకితభావానికి గుర్తుగా నిలిచింది,” అని ముఖ్యమంత్రి అన్నారు.
“కార్మికుల కష్టం నాకు తెలుసు”
చిత్ర పరిశ్రమలో పనిచేసే కళాకారులు, కార్మికులు రాత్రి పగలు తేడా లేకుండా కష్టపడుతున్నారని రేవంత్ రెడ్డి అభినందించారు.మీ శ్రమ వల్లే తెలుగు సినిమా నేడు ఆస్కార్ స్థాయికి చేరింది. ఆ విజయాల వెనుక మీ చెమట ఉంది,” అని పేర్కొన్నారు.
దిల్ రాజుకు ప్రత్యేక బాధ్యతలు
సినీ కార్మికుల సమస్యలను సమీక్షించి పరిష్కరించాలనే ఉద్దేశంతో నిర్మాత దిల్ రాజుకు ఫిల్మ్ డెవలప్మెంట్ కార్పొరేషన్ చైర్మన్ పదవిని అప్పగించినట్లు తెలిపారు.
“ప్రభుత్వం, సినీ పరిశ్రమ మధ్య వారధిగా ఆయన పని చేస్తారు,” అని చెప్పారు.
“గద్దర్ అవార్డులు – ప్రజా చైతన్యానికి ప్రతీక”
నిలిపివేసిన నంది అవార్డుల స్థానంలో రాష్ట్ర ప్రభుత్వం గద్దర్ అవార్డులు ప్రారంభించిందని తెలిపారు.ఇవి కేవలం సినిమా అవార్డులు కావు — ప్రజా యుద్ధ నౌక గద్దర్ స్ఫూర్తిని ప్రతిబింబిస్తాయి,” అని ముఖ్యమంత్రి వివరించారు.
“తెలంగాణ రైజింగ్ 2047లో ఫిల్మ్ చాప్టర్”
రాష్ట్రం రూపొందిస్తున్న ‘తెలంగాణ రైజింగ్ 2047’ ప్రణాళికలో సినీ పరిశ్రమకు ప్రత్యేక అధ్యాయం ఉంటుందని ప్రకటించారు.ఐటీ, ఫార్మా లాగే సినిమాకి కూడా మా ప్రభుత్వం ప్రాధాన్యతనిస్తుంది. హైదరాబాద్ను ప్రపంచ సినీ కేంద్రంగా తీర్చిదిద్దుతాం,” అని అన్నారు.
కార్మికుల పిల్లలకు కార్పొరేట్ స్థాయి విద్య
కృష్ణానగర్లో ప్రభుత్వ భూమిని గుర్తించి, నర్సరీ నుండి 12వ తరగతి వరకు కార్పొరేట్ స్థాయిలో స్కూల్ ఏర్పాటు చేస్తామని తెలిపారు.మీ పిల్లలకు మంచి చదువు అందించే బాధ్యత ప్రభుత్వం తీసుకుంటుంది,” అని హామీ ఇచ్చారు.
ఉచిత వైద్య సదుపాయాలు – ఆరోగ్యశ్రీ ద్వారా
సినీ కార్మికుల ఆరోగ్య సమస్యలను దృష్టిలో ఉంచుకుని, వారికి ఆరోగ్యశ్రీ పథకం ద్వారా ఉచిత వైద్య సేవలు అందిస్తామని వెల్లడించారు.“మీ ఆరోగ్యం మా బాధ్యత,” అని రేవంత్ రెడ్డి హామీ ఇచ్చారు.
సినీ కార్మికుల వెల్ఫేర్ ఫండ్కు రూ.10 కోట్లు
సినీ కార్మికుల సంక్షేమం కోసం ఒక వెల్ఫేర్ ఫండ్ ఏర్పాటు చేయాలని సూచించారు.
“రాష్ట్ర ప్రభుత్వం ఆ నిధికి ప్రారంభంగా రూ.10 కోట్లు అందిస్తుంది,” అని ప్రకటించారు.
టికెట్ ధరలలో 20 శాతం వాటా కార్మికులకు
భవిష్యత్లో సినిమా టికెట్ ధరలు పెంచాలంటే, అందులో 20 శాతం కార్మికుల వెల్ఫేర్ ఫండ్కు కేటాయించాలని నిబంధనలు సడలిస్తామని తెలిపారు.
“సినిమా ఆదాయంలో కార్మికుల వాటా ఉండాలి — అదే న్యాయం,” అని స్పష్టం చేశారు.
ఫైటర్స్కు ప్రత్యేక ట్రైనింగ్ సెంటర్
భారత్ ఫ్యూచర్ సిటీలో సినీ ఫైటర్స్ ట్రైనింగ్ కోసం ప్రత్యేక స్థలం కేటాయిస్తామని ప్రకటించారు.యాక్షన్ సీన్స్లో రిస్క్ తీసుకునే ఫైటర్స్కు ప్రపంచస్థాయి శిక్షణ అందిస్తాం,” అని తెలిపారు.
“మిత్ర ధర్మం వదలని కర్ణుడిలా…”
సినీ కార్మికుల పట్ల తెలంగాణ ప్రభుత్వం ఎల్లప్పుడూ అండగా ఉంటుందని ఆయన హామీ ఇచ్చారు.కర్ణుడు ప్రాణం పోయినా మిత్ర ధర్మం వదల్లేదు — అలానే మేము మీకు అండగా ఉంటాం,” అని ముఖ్యమంత్రి స్పష్టం చేశారు.
నవంబరులో మరో సమావేశం
సినీ కార్మికుల సమస్యలపై నవంబర్ చివరి వారంలో మరో సమావేశం ఏర్పాటు చేస్తామని తెలిపారు.కార్మికుల సంక్షేమం కోసం ఒక సమగ్ర ప్రణాళికతో ముందుకు వెళతాం,” అని ముఖ్యమంత్రి తెలిపారు.
“చిత్తశుద్ధి ఉంటే ప్రకృతి కూడా సహకరిస్తుంది”
సమావేశం ముగింపు సందర్భంగా రేవంత్ రెడ్డి భావోద్వేగంగా మాట్లాడుతూ —
“ఆలోచనలో చిత్తశుద్ధి ఉంటే ప్రకృతి కూడా సహకరిస్తుంది. తెలుగు సినిమా అభివృద్ధి కోసం మనమంతా కలిసి కృషి చేద్దాం,” అని అన్నారు.