మాడుగులపల్లి, నవంబర్ 13 (డైనమిక్ ప్రతినిధి)
గ్రామపంచాయతీ కార్మికులు గ్రామాభివృద్ధికి అంకితభావంతో పనిచేస్తున్నప్పటికీ, ప్రమాదవశాత్తు మరణించిన వారి కుటుంబాలు ప్రభుత్వ సహాయం లేక వేదనను అనుభ విస్తున్నాయని గౌరవాధ్యక్షులు రొండి శ్రీనివాస్ అన్నారు. మాడుగుల పల్లి మండల కేంద్రంలో నిర్వహించిన గ్రామపంచాయతీ కార్మికుల మండల కమిటీ సమావేశంలో ఆయన ముఖ్య అతిథిగా పాల్గొని మాట్లాడుతూ —
ప్రమాదాల్లో ప్రాణాలు కోల్పోయిన కార్మికుల కుటుంబాలకు ఎటువంటి అండలేదు
ఇప్పటికీ పలు కారణాలతో గ్రామపంచాయతీల్లో పనిచేస్తూ అనేక మంది కార్మికులు ప్రమాదవశాత్తు మరణించారని, కానీ వారి కుటుంబాలకు ఎలాంటి ఆర్థిక సహాయం అందడం లేదని ఆయన ఆవేదన వ్యక్తం చేశారు.“ప్రభుత్వం పథకాల గురించి గొప్పలు చెప్పుకుంటూ ఉండటమే తప్ప, ఈ కార్మికుల జీవితాలు, మరణాలు పట్టించుకోవడం లేదు,” అని విమర్శించారు.
కనీసం దహన సంస్కార ఖర్చు కూడా ఇవ్వడం లేదు
“బ్రతికినప్పుడు తక్కువ వేతనం, చనిపోయిన తర్వాత కనీసం దహన సంస్కార ఖర్చుకైనా సహాయం ఇవ్వని పరిస్థితి ఉంది,” అని శ్రీనివాస్ ఆగ్రహం వ్యక్తం చేశారు.గ్రామపంచాయతీ కార్యదర్శులు, ఎంపీడీవోలు, ప్రభుత్వ అధికారి లు పనులు అప్పగించినప్పుడు ఈ కార్మికులు ముందు వరుసలో పనిచేస్తారని, కానీ వారి మరణం తర్వాత మాత్రం ఎవరూ పట్టించుకోవడం లేదని అన్నారు.
ప్రతి మరణించిన కార్మిక కుటుంబానికి రూ.10 లక్షల పరిహారం ఇవ్వాలి
మాడుగులపల్లి మండలంలో ఇప్పటివరకు చనిపోయిన గ్రామపంచాయతీ కార్మికుల కుటుంబాలకు ప్రభుత్వం, ఎంపీడీవో కార్యాలయం, లేదా పంచాయతీ కార్యదర్శుల నుండి ఒక్క రూపాయి కూడా అందలేదని ఆయన తెలిపారు.“ఇప్పటికైనా ప్రభుత్వం స్పందించి ప్రతి మరణించిన కార్మిక కుటుంబానికి కనీసం రూ.10 లక్షల పరిహారం అందించాలి,” అని రొండి శ్రీనివాస్ డిమాండ్ చేశారు.
కార్యక్రమంలో పాల్గొన్నవారు
ఈ సమావేశంలో గ్రామపంచాయతీ యూనియన్ మండల అధ్యక్షులు కొండేటి నరసయ్య, కార్యదర్శి యాదమ్మ, నాయకులు రాజశేఖర్ రెడ్డి, అంజయ్య, వెంకటయ్య, వెంకన్న, వెంకట్, రాములు, సునీత, గణేష్ తదితరులు పాల్గొన్నారు.